Til að endurgjalda heimboðið þá buðum við Gísla og Bobby í mat á sunnudagskvöldið. Reyndar byrjaði dagurinn á því að við fórum í Stanford Shopping Center til að reyna að finna svartar Levi's buxur á Finn (þetta fer að verða að einhvers konar complexi... ;) en í ljós kom að Macy's selur ekki Levi's. Þar með missti Finnur allan fataverslunaráhuga og við enduðum í staðinn í matarinnkaupum í Safeway. Að því loknu var haldið heim þar sem við lúlluðum smá (erfitt að versla svona mikið á svona stuttum tíma) og svo var tekið smá til áður en Gísli og Bobby komu.

Þau komu með ísgerðarvél með sér - enda planið að búa til ís - en því miður gleymdist einn hlutur heima þannig að það verður að bíða betri tíma. Það var svo sem ekki það eina sem fór úrskeiðis því kjötið sem við keyptum í Safeway reyndist vera ólseigt og með lifrarbragði en það varð bara að hafa það... Finnur heimtar að héðan í frá verði allt kjöt í svona veislur keypt hjá Dittmer's í framtíðinni.

En til að bæta málið þá skruppu Finnur, Gísli og Bobby út í búð eftir matinn og keyptu ís á meðan Hrefna var eftir heima og tók til eftir matinn. Síðan var étinn vanilluís með ávaxtakokteil, rjóma, hnetum, hnetusmjöri og súkkulaðisósu - og geri aðrir betur!! Nammi namm er það eina sem maður gat sagt!!

Af öðrum fjölskyldumeðlimum er það að frétta að í dag var skírður sonur Arnars móðurbróðurs og Magneu. Drengurinn heitir Eyþór Arnarsson sem er alveg nýtt nafn í báðum fjölskyldum. :) Hér með er pantaður myndavefur af drengnum!! ;)

Einnig er það að frétta að Hulda móðursystir og fjölskylda (þ.e.a.s. Ágúst maðurinn hennar, Unnar Steinn sonur hennar, Hjörtur sonur hans, Ásdís Sól dóttir þeirra og Óðinn sonur þeirra - alveg týpísk íslensk fjölskylda!) eru flutt til Belgíu þar sem Ágúst verður menningardiplómati ef ég man rétt. Hér með er pantaður vefur með myndum og allegræ! ;) Eftir verður Embla dóttir Ágústar en hún kemur væntanlega í heimsókn til þeirra reglulega! :)